André hevur longt sáttmálan við HB

André Olsen hevur skrivað nýggjan sáttmála við HB, sum merkir, at toftamaðurin skal standa á odda fyri besta mansliðnum hjá havnarfelagnum til og við 2027. Tað kunngerð HB á Facebook.

André Olsen varð settur sum venjari, tá Adolfo Sormani legði frá sær fyrst í mai efttir eyðmýkjandi stórtap ímóti NSÍ. Í fyrstu atløgu var talan um fyribils starv, áðrenn toftamaðurin varð settur hetta kappingarárið út.

Úrslitini hjá HB hava verið góð, síðan André Olsen setti seg í heita sessin. Í føroysku deildini hevur HB vunnið 40 av 48 møguligum stigum, og í evropa gav HB donska stórfelagnum Brøndby skarpan gang bæði úti og heima.

Í løtuni er HB nummar trý í landskappingini við 55 stigum. Tað eru tvey stig aftanfyri NSÍ og níggju stig aftanfyri KÍ á fyrsta plássi.