Fakfeløg: Lítið skil í at umskipa aðalráðini nú

- Ilt er at síggja skilvísið í einari avgerð um at skipa føroysku stjórnina av nýggjum, nú bert fáir mánaðir eru eftir, til nýval skal útskrivast. Tey aðalráðini, sum vórðu stovnað eftir seinasta løgtingsval, brúktu langa tíð at skipa seg, og nú skulu øll skipa seg av nýggjum. Eftir løgtingsvalið skulu ráðini mest sannlíkt aftur skipa seg, tí hetta nýggja málsøkjabýtið ikki hóskar seg til valdsbýtið millum flokkarnar í einari komandi stjórn.

Tað siga Búskapar- og løgfrøðingafelagið og Akademikarafelagið í almennari fráboðan.

Feløgini eru eisini ónøgd við, hvussu løgmaður hevur framt broytingina.

Samsvara ikki við sáttmálarnar

- Vit vilja sum fakfeløg gera vart við, at vit ikki meta, at slíkar bygnaðarbroytingar samsvara við sáttmálarnar við landsstýrið um samstarvsráð og innlit. Vit mæla til, at munagóð stig vera tikin fyri at rætta gongdina beinanvegin, siga feløgini.

Tey vísa á, at sáttmálarnir hjá feløgunum siga, at stórar avgerðir bara kunnu takast, eftir at innlit er givið í øll viðurskifti um avgerðirnar. 

Eisini er føst mannagongd í fyrisiting, at týðandi avgerðir ikki vera tiknar, uttan at avvarðandi partar verða hoyrdir.

Ørkymlandi fyri rættartrygdina

Um sama tilgongd verður í framtíðini, har eingi fyrilit vera tikin fyri sáttmálafestum mannagongdum, og har fakfeløgini hvørki vera spurd ella kunnað, fyrr enn alt er leyst og liðugt, er hetta sera ørkymlandi fyri rættartrygdina hjá okkara starvsfólkum, siga Búskapar- og løgfrøðingafelagið og Akademikarafelagið.