Skaðiligt tilfar í Eirargarði 2

Asbest, PCB og tungmetallir eru í skrivstovuhølunum hjá Heilsumálaráðnum og Almanna- og mentamálaráðnum, Eirargarður 2.

Tað vísir kanning, sum Teknologisk Institut hevur gjørt av bygninginum.

Asbest, PCB og tungmetallir eru skaðilig og dálkandi evni, sum millum annað kunnu vera krabbaelvandi.

Í næstu viku verður endaliga gjørt av, hvat av tilfarinum verður beint burtur, og hvussu tilfarið skal beinast burtur, sigur Jógvan Ósá, stjóri í Bústøðum.

Bústaðir taka yvir Eirargarð 2 tíðliga næsta ár. Og stendur tað til Landsstýrið, skulu lestraríbúðirnar standa klárar við lestrarbyrjan í september næsta ár.

Við kanningini eru á leið fýra vikur lagdar afturat umvælingini av Eirargarði 2, men kanningar broyta ikki stórvegis verandi tíðarætlan, sigur stjórin í Bústøðum.