Lisa flytur talvfólkið fyri genturnar

Ikki eru tær nógvar, genturnar í føroyskari telving, men ein av teimum er 11 ára gamla Lisa Xin, sum vann sítt fjórða føroyameistaraheitið um vikuskiftið. 

Ikki nóg mikið við tí. Fyrr í ár vann hon eisini norðurlendska meistaraheitið fyri gentur føddar í 2012 og seinni.

 - Tá hon telvar, sær mann ordiliga væl, at hon fer inn í eina bobblu. Hon hevur stór og vakin eygu og er fullkomuliga fokuserað. Har er einki annað, sum órógvar hana, sigur fyrrverandi venjari hennara, Haldur Suni Johansen.

Talv hevur leingi verið ein mansdomineraður ítróttur í Føroyum, og Lisa Xin telist millum fáu genturnar, sum telva av álvara. Seks vóru við til FM-kappingina fyri gentur, sum var leygardagin.

 - Um vit hyggja at altjóða styrkislistanum, so eru vit yvir 300 telvarar, har millum eitt og tvey prosent eru konufólk. Tað er ein stór undirumboðan, sum ikki er í lagi, sigur Ingi Wiberg, forseti í Talvsambandi Føroya. 

Hann ásannar, at sambandið og feløgini hava ilt við at halda ungum gentum til, tí tær krevja annað enn siðbundnu hugsanina um, hvussu talv skal skipast í Føroyum. 

Lisa Xin flennir, tá hon verður spurd, um hon ætlar sær at røkka eins langt og fyrimyndin Magnus Carlsen, meðan pápi hennara Quin Xin staðfestir, at tey ikki neyðturviliga sikta eftir at menna ein stórtelvara.

 - Vit brúka talv sum eitt slag av venjing fyri at menna hennara kritiska hugsanarhátt. Hon kann røkka langt, men tað er treytað av, hvussu nógv arbeiði hon leggur í, tí annað spennandi er, sum hon kann fáa áhuga fyri í framtíðini, sigur hann.