Sáttmáli gjørdur um nýggja fongslið við Áir

Sáttmáli er gjørdur um arbeiðið at byggja nýtt fongsul við Áir, upplýsir Løgmálaráðið

Styrelsen for Danmarks Fængsler hevur skrivað undir sáttmála við WSP Danmark A/S, sum saman við undirveitarunum Friis & Moltke (Danmark), JJW Arkitekter (Danmark), MAP Arkitektar (Føroyar), LYTT Architecture (Danmark), LBF (Føroyar), PB Consult (Føroyar) og Hollingsworth Pack (Danmark), skulu standa fyri arbeiðinum at byggja nýggja fongslið.

Nógvar fyritøkur hava víst arbeiðinum at byggja nýggja fongslið í Føroyum áhuga, sigur Løgmálaráðið.

Landsstýrismaðurin í lógarmálum, Bjarni K. Petersen, sigur seg fegnast um, at arbeiðið er komið so langt, at sáttmáli nú er undirskrivaður, og at føroyskar fyritøkur og føroyskir arkitektar eru umboðaðir í toyminum, sum skal byggja fongslið.

Tá ið farið verður undir arbeiðið at gera grundøkið byggibúgvið, og tá farið verður undir sjálva byggingina, fáa føroyskar fyritøkur møguleikan at bjóða seg fram og veita tænastur.

Nýggja fongslið við Áir kemur í staðin fyri varðhaldið í Mjørkadali, og eftir ætlan skal fongslið standa liðugt við árslok 2030.