Ruth vil hava politiska avgerð um tunnil til Tjørnuvíkar

Tjørnuvíkartunnilin er liðugt projekteraður, og í somáta er klárt hjá tunnilstoyminum, sum gjørdi Dalstunnilin, at fara ígongd. 

Og tað arbeiðið skal byrja, beinanvegin, sigur Henrik Old, løgtingsmaður fyri Javnaðarflokkin.

Henrik: Nú má borast til Tjørnuvíkar

Løgtingsmaðurin er farin at ótolnast, og hann skilir als ikki orðingina í fíggjarlógnii, har tað stendur at "politisk støða má takast til verkætlanina."

Tá landsstýrið fyrr í desember gjørdi eina røð av broytingum í sínum egna fíggjarlógaruppskoti, varð játtanin til at gera Tjørnuvíkartunnilin lækkað við tveimum milliónum, úr fimm niður í tríggjar milliónir krónur.

Sambært Ruth Vang, sum umframt at vera landsstýriskvinna í fíggjarmálum nú eisini umsitur samferðslu og tunnilsmál, standa umleið 12 milliónir krónur av óbrúktari játtan til Tjørnuvíkartunnilin frá undanfarnu árum. Og tí ber í princippinum til at fara ígongd.

-Men neyðugt er tó at taka eina politiska støðu, sum eisini hevur við sær semju um at játta fleiri pengar til tunnilin næstu árini, sigur Ruth Vang.

Ta avgerðina vil hon hava samgonguna at taka fyrst í komandi ári. 

Á fíggjarlógini fyri 2026 eru sum nevnt settar av tríggjar milliónir krónur. Og á langtíðarjáttanini eru 10 milliónir settar av í 2027 og aðrar 10 milliónir í 2028.

Sambært Landsverki er Tjørnuvíkartunnilin eitt sindur dýrari enn Dalstunnilin, sum kostaði 180 milliónir.