Nógv meiri gransking krevst

Tættari samstarv skal vera millum Fróðskaparsetrið og hinar granskingarstovnarnar í Føroyum.

Ein nýskapanardepil skal skipast at standa fyri tí. 

Hetta eru millum tilmælini hjá ráðnum fyri gransking, menning og nýskapan, sum hevur givið út sína triðju ársfrágreiðing.

Ráðið hevur átta tilmæli.

Føroyar skulu seta sær sum mál at økja íløgur í gransking og menning á hvørjum ári, til vit í minsta lagi røkka trimum prosentum av BTÚ í 2030.

Gransking og nýskapan skulu raðfestast nógv hægri fyri at kunna skapa inntøkur til føroyska samfelagið, sum kunnu bøta um haldførið í búskapinum.

Játtanin til gransking og nýskapan skal hækka munandi. 
Ein afturberingarskipan skal setast í verk, har nýskapandi fyritøkur fáa part av íløgunum til gransking og nýskapan endurgoldnar.

Allur stuðul í eina eind

Allar stuðulsskipanir til gransking og nýskapan skulu savnast í eina eind at fyrisita.

Almennir stovnar skulu eggjast at troyta viðkomandi møguleikar í altjóða skipanum, sum Føroyar eru partur av. 

Granskingar- og framtakseindin á Fróðskaparsetrinum skal víðkast til eisini at veita granskarum á øðrum granskingarstovnum og fyritøkum stuðul til at skriva umsóknir.

Og uppskot um heildarætlan um gransking og nýskapan frá ráðnum fyri gransking, menning og nýskapan skal orðast í samráði við landsstýrið og leggjast fyri løgtingið.

Eftir nýggjár er ætlanin at leggja frágreiðingina fyri politisku skipanina og kjakast um eina heildarætlan fyri komandi árini.