Tíggju innkallingar um pensjónsaldur

Tíggju innkallingar eru til fundin hjá trivnaðarnevndini, sum hósdagin fer at viðgera uppskotið hjá landsstýrinum um at hækka pensjónsaldurin.

Landsfelag pensjónista, Áhugabólkur pensjonista, næmingaráðið á Glasi, Fakfelagssamstarvið, Samtak, Heilsuhjálparafelagið, Búskaparráðið, Arbeiðsgevarafelagið, landsstýriskvinnan í fíggjarmálum saman við Hagstovuni og landsstýriskvinnan í almanna- og heilsumálum saman við Almannaverkinum hava fingið fundarboð.

Nevndin fekk uppskotið 17. desember og skal koma við áliti í seinasta lagi fríggjadagin í næstu viku.

Landsstýrið hevur uppskot um at hækka pensjónsaldurin upp í 69 ár. 

Pensjónsaldurin er 67 og eitt hálvt ár í dag. 

Og longu nú er ásett, at hann verður 68 ár í 2030.

Upp í 69

Við nýggja lógaruppskotinum hækkar pensjónsaldurin upp í 68 og eitt hálvt ár í 2035.

Síðani verður meira ferð sett á, og pensjónsaldurin verður 69 ár longu í 2038.

Sambært lógaruppskotinum skal avgerast í seinasta lagi 1. januar í 2031, hvør pensjónsaldurin verður í 2041. 

Og í seinasta lagi 1. januar í 2034 skal avgerast, hvør hann verður í 2044.

Fyribils metingin hjá landsstýrinum er, at hækkaði pensjónsaldurin úr 68 árum upp í 69 ár betrar almenna raksturin 70 til 100 mió. kr. um árið. 

Tá eru avleiðingar fyri Samhaldsfasta ikki taldar við.