Olvheðin í norskari sangkapping

- Mær dámar betur The Voice enn X-Factor, tí har er størri fokus á sjálvan sangin og ikki so nógv alt hitt.

Soleiðis sigur Olvheðin Jacobsen. Fríggjakvøldið var hann at síggja á TV2 í Norra, tá vælumtókta sendingin, The Voice, bleiv víst.

Fyri nøkrum árum síðani var Olvheðin Jacobsen við í donsku undirhaldssendingini, X-Factor, og nú gjørdi hann enn eina roynd at gera vart við seg sum sangari og samstarva við dugnaligar tónleikarar.

Tað bar tó ikki á mál, tí eingin av teimum fýra dómarunum í kappingini valdi Olvheðin Jacobsen, sum sang sína útgávu av sanginum "What a wonderful world".

Men tað var rættiliga tilvildarligt, at Olvheðin yvirhøvur kom við í sendingina.

- Eg sang kór í semifinaluni í The Voice í fjør, og so vóru tað fleiri, sum spurdu, um eg ikki kundi stilla upp í kappingini hesaferð, men tað helt eg ikki. Men so var tað eitt av starvsfólkunum frá The Voice, sum setti seg í samband við meg, og eg fekk ein tíma at taka avgerð. Eg hugsaði "hví ikki", og eg havi einki at missa. Eisini er tað góð eksponering, tí The Voice í Norra er líka stórt sum X-Factor í Danmark, fortelur Olvheðin Jacobsen, sum seinasta hálvtannað árið hevur búð í Norra saman við unnustanum.

Í morgunsendingini greiðir Olvheðin Jacobsen frá luttøkuni í The Voice í Norra.