Royndi at smugla 1,9 kilo av hassji

Ein ungur maður úr Danmark í 20'unum var tikin á flogvøllinum í Vágum í gjár við 1,9 kilo av hassji.

Tað var klokkan 19:38 í gjárkvøldið, um somu tíð sum Føroyar spældu EM-hondbóltsdyst í Norra, at hundurin hjá tollvaldinum varnaðist okkurt í viðførinum hjá unga manninum. Har varð funnin ein stór nøgd av hassji.

Maðurin varð afturhildin, og løgreglan handtók hann. 

Maðurin skuldi fyri rættin í morgin við kravi um varðhaldsfongsling. Men eftir at hava tosað við verja sín, so játtaði hann seg sekan í øllum. Tí fekk hann ein sokallaðan strakstóm, sum ljóðar upp á fýra mánaðir fongsul. 

Maðurin varð síðani leyslatin og verður innkallaður at sita dómin seinni - helst í Danmark, sigur vakthavandi hjá politinum.

Danska politiið kendi mannin, men hann var ókendur fyri føroyska politiið.