Suðuroyartunnilin: Uppskotið kemur úr fíggjarnevndini 18. februar

Lógaruppskotið um Suðuroyartunnil skal úr aftur fíggjarnevndini um tvær vikur, 18. februar.

Tað sigur Eyðgunn Samuelsen, forkvinna, sum hevur boðsent løgmanni á fund í nevndini í morgin. 

Tað vakti ans, tá fíggjarnevndini í farnu viku sendi heilar 59 spurningar til løgmann at svara.

Spurningarnir koma aftrat frammanundan rúgvismikla tilfarinum til lógaruppskotið um at fyrireika, prosjektera og bjóða út Suðuroyartunnilin.

Spurningarnir fevna breitt - flestu um teknisk viðurskifti av alskyns slag, aðrir um inntriv á náttúru og djóralív.

Suðuroyartunnil og spurningar til løgmann

Savnaðir saman í eitt skjal

Eyðgunn Samuelsen, forkvinna í fíggjarnevndini, sigur við Kringvarpið, at spurningarnir koma frá einstøku fíggjarnevndarlimunum, og eru síðani savnaðir saman í eitt skjal til Løgmansskrivstovuna.

Freistin at svara var longd til í gjár, upplýsir hon. 

Í morgin skal løgmaður møta í fíggjarnevndini, saman við partafelagnum Suðuroyartunnilin.

- Tá verða svarini umrødd, og høvi verður at spyrja uppaftur, um okkurt er ógreitt, sigur hon.

Tveir fundir aftrat

Tveir fundir afturat eru ásettir í fíggjarnevndini - 9. og 12. februar - áðrenn álitið skal skrivast, og lógaruppskotið um Suðuroyartunnilin skal úr aftur fíggjarnevndini 18. februar.

- Greiða málið er, at freistin skal halda, sigur Eyðgunn Samuelsen. 

Hon vil tó einki siga um, hvørt semja er í nevndini, ella hvussu nógv álit koma úr aftur fíggjarnevndini, tá avtornar.