Neytabøndur skulu fáa part av yrkisútbúgving í Føroyum

Longu nú ber til hjá teimum, sum eru undir útbúgving uttanlands, at taka starvsvenjingina í Føroyum. Varmakeldugarðurin er góðkendur til endamálið

Arbeitt verður við møguleikanum at skipa yrkisútbúgving til neytabónda í Føroyum.

Mynd: Gestur Lómstein

Frants Jensen

04.02.2026 - 14:15

Barna- og útbúgvingarmálaráðið arbeiðir saman við Búnaðarstovuni og Miðnámi í Vestmanna at skipa eina føroyska útbúgving, sum svarar til fyrsta árið í yrkisútbúgvingini at gerast neytabóndi.

- Hetta kundi gjørt, at fleiri fara undir hesa útbúgvingina, sigur Tróndur G. Leivsson, stjóri á Búnaðarstovuni.

Varmakeldugarðurin í Gøtudali

Varmakeldugarðurin í Gøtudali. (Mynd: Gestur Lómstein)

Herfyri kom fram, at føroyingar, ið útbúgva seg til neytabónda uttanlands, nú kunnu taka starvsvenjingina í Føroyum. Varmakeldugarðurin í Gøtudali er sum tann fyrsti í Føroyum góðkendur til endamálið.

Um leisturin, sum arbeitt verður við í løtuni, verður veruleiki, verður fyrsta árið í útbúgvingini tikið á Miðnámi í Vestmanna.

Síðani verður farið í starvsvenjing á einum garði í Føroyum í tvey ár, áðrenn síðsti parturin av útbúgvingini verður tikin uttanlands.

Talan er vanliga um nøkur skeið í umleið 8-10 vikur, í mesta lagi eitt ár tilsamans.

Hoyr innslag í útvarpstíðindunum:

04022026_Neytabondur