Lestraríbúðir seinkaðar eitt ár og nógv dýrari

Tað verður fleiri tíggjutals milliónir dýrari at umvæla Eirargarð 2 til lestraríbúðir enn upprunaliga ætlað.

Tað er greitt, nú millum annað allar innleggingar og alt el-arbeiðið í bygninginum skal gerast av nýggjum.

Tann politiska ætlanin hevur allatíðina verið, at lesandi skulu sleppa inn eftir summarfrítíðina í ár í tær 45 íbúðirnar, ið ætlanin er at gera í bygninginum.

- Men tað fer at taka eitt ár afturat at gera bygningin lidnan, sigur Jógvan Ósá, stjóri í Bústøðum.

Ætlanin var at bíða nøkur ár við at skifta vindeygu, tekju og gera útveggirnar, men nú er ætlanin at gera alt beinanvegin, tí tað má tó gerast innan fá ár.

Sama leigukostnað 

At so nógv skal gerast við bygningin, ger sum sagt, at umvælingin verður munandi dýrari.

Leigarin skal eftir ætlan tó ikki rinda nógv hægri leigukostnað enn tað, sum áður er upplýst, nevniliga umleið 3.500 krónur um mánaðin.

- Ætlanin er framvegis at hava ein leigukostnað á umleið 3.500 krónur á Eirargarði, sigur Margit Stórá, landsstýriskvinna.

Men hon hevur tó einki svar, hvar pengarnir fyri umbyggingina skulu koma frá.