Føroysku og grønlendsku umboðini kunnu fáa ávirkan á fólkatingsvalið

Fólkatingslimirnir í Føroyum og Grønlandi fara eftir øllum at døma aftur hesa ferð at fáa stóran leiklut á fólkatingsvalinum í morgin, tí sambært veljarakanningum í Danmark rógva flokkarnir á reyða veingi og bláa veingi borð um borð.

Og tað var júst støðan, sum formaðurin danska flokkinum, Moderaterne, Lars Løkke Rasmussen, var sera ónøgdur um á fólkatingsvalinum í 2022. 

Tá vóru tað norðuratlantisku tinglimirnir, sum avgjørdu valið við 90 sessum til reyða veingin, hóast Metta Frederiksen endaði við at skipa stjórn tvørtur um miðjuna.

- Orsakað av atkvøðunum í Grønlandi er reyður meiriluti í Danmark. Annars hevði ikki verið reyður meiriluti, segði Lars Løkke Rasmussen tá.

Uppteljingin vísti, at flokkarnir á bláa veingi saman við Moderatunum fingu 62.501 atkvøður fleiri enn reyði vongur, um bara atkvøðurnar í Danmark vóru taldar við, og ikki allur ríkisfelagsskapurin, skrivar TV2.