Valluttøkan er størst á løgtingsvali

Løgtingsval hevur verið í dag. Valhølini eru latin aftur, og teljingin er í gongd.

Annars vísa føroysk valtøl týðuliga, at føroyingar eru raskir at velja.

Munur á luttøku
Men munur er á teimum trimum valunum, sum føroyingar flestir hava rætt at velja til. Tølini sveiggja nakað, men eingin ivi er um, at føroyingar vísa størstan áhuga fyri løgtingsvali, síðan kommunuvali, og til endans fyri fólkatingsvali.

Tølini sveiggja nakað, men valluttøkan til løgtingsval plagar at vera okkurt um 90 prosent. Kommunuval plaga at fáa umleið 80 prosent av fólkinum at velja.

Fólkatingsval sveiggjar nógv
Í hesum sambandi er vert at leggja merki til, at føroyska luttøkan á fólkatingsvali sveiggja munandi meiri enn til løgtingsval og kommunuval. Men runt roknað 70 prosent ella minni av veljarum í Føroyum plaga at vera á fólkatingsvali. Á fólkatingsvalinum fyrradagin var luttøkan 75,5 prosent, sum er óvanliga nógv.