Keypsportalurin sparir almennum stovnum milliónir

Mett verður, at rammusáttmálarnir hjá landinum, sum eru gjørdir gjøgnum Keyp Landsins, merkja eina árliga sparing fyri landsins stovnar á umleið 6,5 milliónir krónur.

Tað verður sagt í ársfrágreiðingini hjá Gjaldstovuni.

Har stendur eisini, at talið á almennum útboðum vaks 61 prosent í 2025.

Standardiseringin av vørukeypinum hjá tí almenna merkir eina sparing upp á fleiri milliónir hjá almennu stovnunum, virkna kapping á marknaðinum, har allar fyritøkur fáa javnbjóðis møguleika, og at gjøgnumskygni verður tryggjað fyri øll almenn keyp.

Ongantíð áður eru so nógv útboð stovnað, metnógvir rammusáttmálar gjørdir, og alsamt fleiri stovnar bjóðaðu uppgávur út.

Royndirnar í 2025 staðfesta, at útboð er eitt sterkt amboð hjá landinum at effektivisera almenna raksturin og stimbra kapping, skrivar Gjaldstovan.