Løkke vil hava stjórn á miðjuni

Lars Løkke Rasmussen, formaður í Moderatunum í Danmark, leggur nú trýst á Mette Frederiksen, virkandi forsætisráðfrú og samráðingarleiðara, um at royna at skipa eina stjórn á miðjuni við Sosialdemokratunum, Konservativa flokkinum, Vinstra og Moderatunum.

Hann heitir á samráðingarleiðaran um at gevast við royndini at skipa eina mið-vinstra stjórn.

Flokkarnir, sum nú samráðast, eru Sosialdemokratarnir, Sosialistiski fólkaflokkurin, Eindarlistin, Radikali flokkurin, Alternativið og Moderatarnir.

Seinasti fundur

Men nú ger formaðurin í Moderatunum greitt, at hetta verður seinasti fundurin hjá Moderatunum við samráðingarborðið hjá Mette Frederiksen, samráðingarleiðara, um hon ikki tekur áheitanina í álvara.

Lars Løkke Rasmussen vil hava Mette Frederiksen at gera eina roynd at hava Vinstra, Konservativa flokkin og Moderatarnar við samráðingarborðið.

Boðini frá formanninum í Moderatunum koma, eftir at Troels Lund Poulsen, formaður í Vinstra, hevur heitt á Lars Løkke Rasmussen um at finna semju um fíggjarpolitikk.