Trump lovar bíligari brennievni eftir kríggið móti Iran

Amerikanski forsetin Donald Trump lovar, at brennievni verður nógv bíligari at keypa so skjótt sum kríggið móti Iran endar.

Samstundis ávarar hann harðliga ímóti at gera nýggja avtalu við Iran, sum minnir um hana, sum Barack Obama gjørdi í 2015. 

Trump sigur, at hetta er vánaligasta avtala nakrantíð, og at hon gav Iran møguleika at fáa kjarnorkuvápn.

- Gevur tú Iran kjarnorkuvápn, fer Iran at spreinga heimin í luftina, sigur Trump í samrøðu við Fox Business Network, sambært BBC, sum hevur útvegað sær eitt brot.

Iran hevði brúkt kjarnorkuvápn 

Hann leggur aftrat, at hevði USA ikki bumbað kjarnorkuverk hjá Iran í fjør, hevði landið brúkt kjarnorkuvápn móti Ísrael og grannalondunum í Miðeystri, - umframt USA.

Deildar meiningar hava verið millum serfrøðingar um Iran er tættari við at fáa kjarnorkuvápn. Tað avsannar landið sjálvt. 

Trump segði í fjør, at hann í stóran mun hevði oyðilagt kjarnorkuætlanina hjá Iran.