Arbeiðsgevarar og arbeiðsfólk samd

Arbeiðsgevarafelagið og arbeiðarafeløgini eru vorðin samd um tvey ára sáttmála.

Tímalønin hækkar 4,17 kr. 1. mai í ár og 5,97 kr. 1. mai næsta ár, tá hon fer upp í 171,94 kr. 

Og eftirlønin hækkar hálvt prosent 1. mai næsta ár, upp í 12,5 prosent. 

Ein partur av lønarkarminum verður nýttur til at hækka viðbøturnar fyri starvsaldur. 

Eisini eru broytingar gjørdar í einstøkum sersáttmálum.

Limirnir í arbeiðarafeløgunum hava fingið fleiri fridagar.

Frídagar

Hjá feløgunum í Havn er 1. novembur vorðin hálvur frídagur.

Hjá feløgunum uttan fyri Havnina er ólavsøkuaftan vorðin frídagur. 

Viðbótin fyri høvuðsreingerð er farin úr 9,15 prosentum upp í 15 prosent.

Tey, sum eru í sáttmálanum um fastløn, fáa nú munin millum lønina og dagpeningin í tríggjar mánaðir í staðin fyri tveir.

Og hjá teimum, sum fáa skaða í arbeiðnum, hevur arbeiðsgevarin skyldu at rinda munin millum lønina og sjúkradagpeningin í upp til seks mánaðir.

Og gjaldsskyldan stendur nú við í 18 mánaðir í staðin fyri 12.