Ráðið fyri ferðslutrygd mælir frá hægri hámarksferð

Lovisa Petersen Glerfoss, stjóri í Ráðnum fyri ferðslutrygd, mælir frá, at hámarksferðin á nýggja Havnarvegnum í Havn verður sett upp, soleiðis sum kreftir í býráðnum í Tórshavnar kommunu ætla.

Tróndur Sigurðsson, býráðslimur, legði uppskot fyri býráðið um at hækka hámarksferðina úr 60 upp í 70 kilometrar um tíman. Býráðið beindi málið í teknisku nevnd, sum hevur tikið undir við uppskotinum, og tað skal nú viðgerast í ferðslunevndini. 

Har hevur Boði Haraldson, býarverkfrøðingur, eisini sæti, og hann segði við útvarpið á middegi í gjár, fríggjadagin 22. mai, at um politiski viljin er at seta hámarksferðina upp, so gera tey tað.

Men tann avgerðin verður í so fall skeiv, heldur Lovisa Petersen Glerfoss, sum vísir á, at vegurin er gjørdur til eina hámarksferð uppá 60 kilometrar um tíman og tískil má broytast samsvarandi, um hámarksferðin skal hækka.