Ongar ítøkiligar ætlanir um dialysuviðgerð í Klaksvík

Eingin ítøkilig ætlan er at seta á stovn dialysuviðgerð á Klaksvíkar Sjúkrahúsið.

Tað sigur, Eyðdis Hartmann Niclasen, landsstýriskvinna í Heilsu- og orkumálum, í einum svari til ein grein 52 fyrispurning frá Elsebeth Mercedes Gunnleygsdóttir, løgtingskvinnu.

Løgtingskvinnan vildi hava at vita, um landsstýriskvinnan hevur ætlanir um at skipa dialysuviðgerð á Klaksvíkar sjúkrahúsi, soleiðis at dialysusjúklingar í Norðoyggjum og Eysturoy kunnu fáa viðgerð í nærumhvørvinum.

Í svarinum verður sagt, at um ein slík skipan skal setast í verk, krevur tað bæði hóskandi hølir, serliga tekniska útgerð og starvsfólk við røttu førleikunum. Harumframt skulu neyðugar tekniskar tillagingar gerast, áðrenn dialysuviðgerð kann veitast á Klaksvíkar sjúkrahúsi.

Íløgan í útgerð og innrætting er mett til góðar 1,8 milliónir krónur. Árligi rakstrarkostnaðurin verður mettur at liggja millum 3,6 og 5,2 milliónir krónur.

Landsstýriskvinnan skrivar eisini í svarið sínum, at tað kann gera tað verri at varðveita fakliga støðið, um tilboðið verður spjatt enn meira enn í verandi støðu. Sambært Sjúkrahúsverkinum er dialysufunktiónin í Føroyum frammanundan kroyst, tá tað ræður um at varðveita eitt nøktandi fakligt støði.