Trý listafólk fáa løn í trý ár

Vónbjørt Vang, Guðrið Poulsen og Gudmund Helmsdal fáa listafólkaløn í trý ár.

Tað hevur nevndin í Mentanargrunni Landsins gjørt av.

Tey trý fáa listafólkaløn at arbeiða burturav við ávikavist bókmentum, myndlist og filmi.

Bókmentaliga faknevndin sigur m.a. um Vónbjørt Vang, at hon hevur prógvað seg sum ein av okkara bestu rithøvundum og hevur fingið viðurkenning her heima og uttanlands. Í verkætlanarlýsingini, sum er nýskapandi, gongur hon nýggjar listaligar leiðir og vísir eina greiða og realistiska ætlan. Í nevndini sótu Poula Gaard og Sanna Klein.

Guðrið Poulsen

Um Guðrið Poulsen sigur listaliga faknevndin, at Guðrið Poulsen hevur seinastu 40 árini verið undangongufólk innan fyri rúmligu listina í Føroyum, har hon støðugt hevur flutt mørk. Sagt verður, at Guðrið Poulsen vil, at list hennara aftur skal manifistera seg á ein nýggjan hátt í rúminum, har áskoðarin følir listina við sínum kroppi, eins og sínum viti. Í myndlistaligu faknevndini sótu Inger Smærup Sørensen og Jóannes Gaard.

Um Gudmund Helmsdal sigur filmsfaknevndin, at Gudmund Helmsdal hevur áhaldandi ment forvitnislig filmshugskot. Arbeiðsætlanin fyri starvstsíðina er greið og fevnir um filmsverkætlanir, sum hava verið í menning í fleiri ár. Ynskið er at brúka listafólkalønina til at hugsavna seg um leikstjóraleiklutin, so filmarnir røkka á mál. Í nevndini sótu Sakaris Stórá og Marianna Mørkøre.

Gudmund Helmsdal

Endamálið við listafólkalønum er at bøta um korini hjá einstaka yrkislistafólkinum. Listafólkið arbeiðir tey trý árini burturav við list. Listafólkalønin svarar í upphædd til læraraløn og 15 prosent í eftirløn.

27 fólk søktu um listafólkaløn, og tey hepnu vóru altso Vónbjørt Vang, Guðrið Poulsen og Gudmundur Helmsdal