Tilfar frá jarðhitaboring endaði í ánni

Dálkað vatn frá einum tyrvingarplássi í Saksunardali er runnið út í Stórá.

Á tyrvingarplássinum verða restir frá jarðhitaboringum lagdar. Sambært Sunda kommunu stendur í loyvunum til jarðhitaboringar, at tilfarið skal burturbeinast til antin Kommunalu brennistøðina ella IRF.

Kommunan sigur, at tekniska deild hevur verið í samskifti við ábyrgdaran og fingið váttan fyri, at viðurskiftini eru rættað, so hetta ikki endurtekur seg.

Kortini hevur hendingin vakt stúran hjá Sílaveiðufelagnum, sum óttast fyri, at dálkingin kann hava ávirkan á lívið í ánni. 

Kommunan upplýsir samstundis, at hon ikki hevur heimild at steðga virkseminum, hóast treytirnar sambært kommununi ikki eru fylgdar. 

Fyritøkan, sum eigur tyrvingarplássið, vildi ikki gera samrøðu við Kringvarpið. Í einari stuttari viðmerking verður tó sagt, at neyðugar tillagingar eru gjørdar fyri at tryggja, at hetta ikki hendir aftur.