André Olsen uppsagdur í HB

André Olsen er ikki longur venjari hjá besta mansliðnum í HB.

Laku úrslitini hetta kappingarárið hevur fingið leiðsluna í felagnum at missa tolið.

 - Eftir vánaligu gongdina seinastu tíðina, er avgerð tikin um at enda samstarvið millum HB og André Olsen, skrivar felagið í stuttari fráboðan hósdagin.

André Olsen avloysti Adolfo Sormani í mai í fjør, og úrslitini vóru sera góð. Í føroysku deildini tapti HB ongan dyst eftir venjaraskifti, og í Evropa gav HB donska stórfelagnum Brøndby skarpan gang bæði úti og heima.

Hetta kappingarárið er kortini stígur komin í. HB liggur í løtuni á 6. plássi við bert 15 stigum fyri 13 spældar dystir. Síðstu átta landskappingardystirnar hevur HB bert vunnið einaferð.

Í steypakappingini vann HB 2-1  á Víkingi í fyrru hálvfinalunu á heimavølli. Seinni dysturin verður í næstu viku.

HB boðar frá, at nýggjur venjari verður settur í næstum.