Eingin ætlan um Kringvarpið

Landsstýrið hevur ikki viðgjørt nakað ítøkiligt uppskot um at seta nevnd, sum skal ráðgeva og hava eftirlit við Kringvarpinum.

Landsstýrið hevur heldur ikki viðgjørt nakrar aðrar ítøkiligar ætlanir um broytingar í Kringvarpinum.

Einki um Kringvarpið stendur í samgonguskjalinum.

Tað sigur Bárður á Lakjuni, landsstýrismaður, í svari til Jenis av Rana, løgtingsmann.

Hann spurdi, um tað kann hugsast, at landsstýrismaðurin tekur undir við at seta nevnd við teirri uppgávu at hava eftirlit við og vera ráðgevandi hjá Kringvarpinum.

Álit

Bárður á Lakjuni sigur, at sum heild hevur hann álit á, at Kringvarpið røkir sína uppgávu.

Men tað merkir tó ikki, sigur hann, at tíðindaflutningurin ikki kann vera evni hjá kjaki ella kritikki. 

Og viðhvørt haldi eg, at kritikkurin er grundaður, sigur Bárður á Lakjuni. 

Politiska skipanin skal og má tó undir ongum umstøðum stýra tíðindaflutninginum.

Kringvarpið má, eins og aðrir stovnar við stórari samfelagsávirkan, tola opið orðaskifti og kritiskar røddir, sigur landsstýrismaðurin.