Løgmaður: Stevning ávirkar ikki fiskiskap

Tað fær onga ávirkan á, hvussu fiskiskapurin eftir makreli og sild í ár verður skipaður, at Fiskimálaráðið er stevnt. 

Kaj Leo Holm Johannesen, løgmaður, hevur svarað formonnunum í andstøðuflokkunum. 

Teir spurdu, um løgmaður veit, at eitt partafelag hevur stevnt Fiskimálaráðnum, tá tað, sambært felagnum, seinastu árini ólógliga hevur umsitið lógina um vinnuligan fiskiskap, tá makrelur og sild eru býtt millum skipini.

Fingu ongan makrel

Partafelagið Lírabergi og manningin á útróðrarbátinum Lírabergi stevndu Fiskimálaráðnum, tí eitt samtak hjá útróðrarbátum ikki fekk lut í makrelkvotuni í 2012. Fiskimálaráðið krevur frídøming, tí tað heldur upp á, at avgerðin var lóglig. 

Enn er óvist, nær rætturin fer at dómsviðgera málið.Løgmaður heldur, at Fiskimálaráðið saktans kann avgera, hvør sleppur at fiska sild og makrel í ár uttan at bíða eftir dóminum. Fiskiskapurin eftir makreli og norðhavssild kann ikki steðgast, tí Fiskimálaráðið er stevnt, Kaj Leo Holm Johannesen, løgmaður, í svari sínum til andtøðuna.