Nikkel mátti lúta fyri Jóannesi

Tað kom ikki óvart á, at dysturin um gullið í compound hjá monnum stóð ímillum teir báðar skjúttarnar úr Ørvi, Nikkel Petersen og Jóannes Poulsen.

Teir vóru best at teimum seks, sum stillaðu upp í Hoydølum, og munurin teirra millum var heldur ikki stórur í finaluni.

Jóannes Poulsen vann trý umfør við einum stigi, Nikkel Petersen vann eitt umfar við einum stigi, og eitt umfar endaði javnt. Tað gav Jóannesi Poulsen 147-145 sigur samanlagt.

 - Stuttligt. Tað er ikki hvørt ár ella hvørja sesong, at tú klárar tað, so at kunna gera tað aftur var ræðuliga lekkurt, segði royndi bogaskjúttin.

Nikkel Petersen mátti viðganga, at hann var næstbestur hesa ferð.

 - Um eg havi gjørt alt mítt besta, og tað framvegis ikki er nóg gott, so er hann bara ein betri skjútti. Tað er, hvat tað er, segði Nikkel Petersen.