AfD fær ikki avgjørdan meiriluta

Høgravendi flokkurin Alternative für Deutschland, AfD, gjørdist stóri vinnarin á týska landspartavalinum í Sachsen-Anhalt í gjár.

AfD fekk 43,8 prosent av atkvøðunum - meira enn tvífalt so nógv sum CDU, sum fekk 17,2 prosent. 

Hóast søguliga góða úrslitið, so fekk AfD tó ikki avgjørdan meiriluta, og tí er framvegis ógreitt, hvør fer at skipa stjórn í landspartinum.

Valúrslitið er samstundis eitt stórt afturstig fyri CDU, og tað kann eisini fáa avleiðingar fyri týska samveldiskanslaran, Friedrich Merz. 

Sambært Steen Nørskov, útsenda tíðindamann hjá DR í Týsklandi, so verður Friedrich Merz longu lagdur undir at eiga ein part av ábyrgdini av ósigrinum á valinum í gjár.

Sera víðgongdur flokkur

AfD er samstundis undir illgruna fyri at vera víðgongdur. Bæði týska fregnartænastan og myndugleikarnir í Sachsen-Anhalt meta flokkin sum víðgongdan og sum eina møguliga hóttan móti fólkaræðnum.

AfD vísir hesum aftur, og flokkurin hevur kært avgerðina. Málið verður nú viðgjørt í rættarskipanini.

Floksdeildin hjá AfD í Sachsen-Anhalt verður mett at vera millum tær mest víðgongdu í Týsklandi, og er undir støðugum eftirliti hjá fregnartænastunum.