Reglurnar í FAS eru framvegis ikki herdar

Í fýra ár hava skiftandi landsstýrisfólk, sum varða av Sjóvinnustýrinum, lovað at endurskoða og herða reglurnar í føroysku altjóða skipaskránni, FAS.

Men lógin er ikki broytt enn.

Tað staðfestir Landsgrannskoðanin í síni ársfrágreiðing fyri 2025.
 
Landsgrannskoðanin hevur umrøtt grannskoðan av FAS í undanfarnum frágreiðingum. Víst verður á, at afturi í 2022 greiddi landsstýrisfólkið frá, at stjórnarráðið og Sjóvinnustýrið vóru í holt við at endurskoða ásetingar í FAS-lógini. 
 
Ætlanin var at áseta í FAS-lógini meira ítøkilig og herd krøv til umboðsfólk hjá eigarum, sum vóru búsitandi uttanlands, soleiðis at umboðsfólk í størri mun kundu ábyrgjast, um viðurskifti mótvegis myndugleikum ikki fóru rætt fram. 

Tryggja seg móti ivasomum virksemi
 
Um størri ábyrgd fór at hvíla á umboðsfólkum kundi væntast, at tey í størri mun fóru at tryggja sær, at tey ikki umboðaðu feløg, har vandi var fyri sambandi við ivasamt virksemi, skrivar Landsgrannskoðanin. 
 
Í 2024 greiddi Umhvørvis- og vinnumálaráðið frá, at ætlanin framvegis var at endurskoða reglurnar og herða krøvini til umboðsfólk. Í august 2025 kunnaði ráðið um, at tey arbeiddu við málinum.
 
Lógin er ikki broytt, staðfestir Landsgrannskoðanin.

Les frágreiðingina frá Landsgrannskoðanini her.