Tignarmerkið: Fólksins heiður

Tað var ein avbjóðing av teimum heilt serligu, sum Sólja í Ólavstovu og Dan Knudsen millum onnur fingu í 2023 frá táverandi landsstýri. Tey skuldu koma við einum tilmæli um ein føroyskan heiður, sum skuldi kunna vera borin saman við til dømis danska riddarakrossinum og íslendska falkinum, men samstundis skuldi hann vera øðrvísi.

- Hesin heiður skuldi vera fólksligur og ikki ein, sum stjórnin letur teimum, ið hava røkt eitt ávíst embæti til dømis, sigur Sólja, sum var forkvinna í nevndini.

Vitjað var í londunum kring okkum um teirra heiðursskipanir, eins og drúgt samskifti var við málráðið um, hvussu heiðurin skuldi eita, tí tað var umráðandi, at hann ikki kundi koma í bland við aðrar heiðrar.

Valið fall á Tignarmerki Føroya, og eftir eina kapping fyri innboðin vann Edvard Fuglø heiðurin at sniðgeva tignarmerkið, sum nú er til almenna hoyring.

Føroyska tignarmerkjaskipanin er øðrvísi enn tær hjá grannalondunum á tann hátt, at øll kunnu innstilla onkran til heiðurin. Tað veri seg innan fyri list, sjálvboðið arbeiði, vinnulív, public service, ítrótt og mangt annað.

Ein nevnd skal so velja, hvør skal fáa Tignarmerkið, sum verður handað á nýggjárinum.

Um alt gongur sum ætlað, verður fyrsta Tignarmerkið handað tann 1. januar 2028, sigur Dan Knudsen.