Varastjórastarv í Sjúkrahúsverkinum lýst leyst av nýggjum

Heilsu- og orkumálaráðið lýsir nú starvið sum varastjóri við læknafakligari bakgrund í Sjúkrahúsverkinum leyst av nýggjum. 

Bara tvær umsóknir komu til starvið, tá freistin fór 28. september. Tveir menn søktu, og farið var undir setanartilgongd.

Heilsu- og orkumálaráðið sigur í dag, at tað metir ikki, at umsóknargrundarlagið er nóg breitt til at halda fram við setanartilgongdini. 

Nýggja umsóknarfreistin er fríggjadagin 30. oktober á middegi.

Ovasti ábyrgdarhavandi lækni 

Varastjórin er ovasti ábyrgdarhavandi lækni í sjúkrahúsverkinum.

Varastjórin virkar eisini sum læknafakligur ráðgevi hjá Heilsu- og orkumálaráðnum.

Tummas í Garði hevur verið varastjóri.

Hann er farin frá og arbeiðir nú sum lækni.