Játtanin til klimaviðgerðir uttanlands er strikað

Sláimaskinan hjá landsstýrinum hevur rakt meint, tá ið røður um klimaviðgerðir uttanlands føroyskum sjúklingum, sum hava psoriasis og gikt. 

Seinnu árini hevur ein millión krónur verið sett av á fíggjarlógini til klimaviðgerðir til limir Psoriasisfelagnum og Giktafelagnum -  ein hálv millión til hvørt felagið. 

Men í fíggjarlógaruppskotinum fyri næsta ár er játtanin strikað. Tað er komið dátt við hjá feløgunum, sum í felags tíðindaskrivið kæra sína neyð:

 - Klimaviðgerðin er skipað viðgerð undir læknaligum eftirliti. Ein lækni metir um umsóknirnar og ger av, hvør hevur læknaligan tørv á viðgerðini. Tað eru ikki øll, sum søkja, ið sleppa við - hóast tey hava eina staðfesta sjúku. Samstundis er tørvurin størri enn játtanin: Fleiri sjúklingar hava tørv á viðgerðini, enn pláss er fyri, siga Psoriasisfelagið og Giktafelagið. 

Feløgini heita á politiska myndugleikan um at varðveita játtanina til klimaviðgerðina og arbeiða fyri einari varandi loysn, so sjúklingarnir ikki skulu berjast fyri sama viðgerðarmøguleika ár eftir ár.