Klárt at handa mentanarvirðislønir landsins í Messuni í Sørvági

Bárður á Lakjuni, landsstýrismaður í mentamálum, handar virðislønirnar, sum verða latnar listafólki og mentafólki fyri serlig listarlig avrik og íkast til føroyska mentan, list og mentanararv.

Tríggjar virðislønir verða latnar umframt sømdargávu landsins.

Mentanarvirðisløn landsins er 150.000 krónur og verður latin føroyskum mentafólki sum viðurkenning og tøkk fyri eitt serligt listarligt avrik.

Heiðursgáva landsins er 75.000 krónur. Hon verður latin persónum, sum hava gjørt eitt týðandi arbeiði fyri at styrkja og fremja mentanarlig virði innan føroyska mentan, list og mentanararv.

Virðislønin til ungt listafólk er 50.000 krónur og verður latin ungum listafólki, sum hevur sýnt serlig listarlig evni og gjørt vart við seg á sínum listaøki. Endamálið er at viðurkenna og stuðla ungum listafólki og eggja teimum til framhaldandi listarliga menning og virksemi.

Sømdargáva landsins verður latin listafólki, sum hevur útint týðandi listarlig avrik og givið eitt virðismikið íkast til føroyskt lista- og mentanarlív. Gávan er 20.000 krónur um árið og verður latin listafólkinum, so leingi tað er á lívi.

Bárður á Lakjuni, Mentanarvirðislønir landsins 2026, mynd: Bjarni Árting Rubeksen

Frítekst tagging: 

Bárður á Lakjuni

Mentanarvirðislønir landsins 2026

mynd: Bjarni Árting Rubeksen