Meira enn 50 ár í føroyskum fótbólti

Í meira enn 50 ár hevur Jens Midjord verið ein trúfastur partur av føroyskum fótbólti. Í 1975 tók hann dómaraprógv og fór undir at døma dystir í føroysku kappingini. Seinni gjørdist hann dómaraeygleiðari, og frá 1990 til 2023 eygleiddi hann meira enn 400 dystir í bestu føroysku deildini.

Herfyri varð Jens Midjord heiðraður av Fótbóltssambandi Føroya fyri drúgva og trúfasta tænastu í føroyskum fótbólti.

Í samrøðu greiðir hann frá, hvussu bæði fótbólturin og dómarayrkið hava ment seg gjøgnum árini. Fyrr var dómaraeygleiðingin meira merkt av at finna feilir, meðan eygleiðarin í dag eisini hevur ein vegleiðandi leiklut, har dómarin verður stuðlaður og hjálptur at menna seg.

Jens Midjord leggur dent á, at ein góður dómari ikki bara skal kenna fótbóltslógirnar, men eisini duga at leiða dystin, hava gott samband við leikararnar og halda høvdið kalt, tá trýstið er stórt.

Hann heldur, at tøkniliga menningin í fótbólti er góð, men ávarar samstundis ímóti, at menniskjaligi parturin av dømingini ikki má hvørva. Dómarar mugu eisini hava loyvi at gera mistøk.

Eftir meira enn hálva øld í fótbólti hevur Jens Midjord framvegis eina greiða áheitan til tey ungu: Takið dómaraskeið og roynið tykkum. Tað kann gerast ein áhugi, sum fylgir tykkum alt lívið.