Sálarfrøðingar skulu løggildast

Danska lógin frá 1993 um sálarfrøðingar kemur nú í gildi í Føroyum.

Heilsumálaráðið hevur sent uppskot um at seta "lov om psykologer" í gildi fyri Føroyar. Í lógini eru neyvar reglur um autorisatión, løggilding, av sálarfrøðingum

Løgtingið hevur samtykt lógina um løggilding av øðrum heilsustarvsfólki, men har eru sálarfrøðingarnir ikki við. Ein onnur lóg er galdandi fyri sálarfrøðingar.

Útbúgva sálarfrøðingar í Føroyum

Danska lógin er nú lagað til føroysk viðurskifti, og landsstýrismaðurin í heilsumálum fer nú í vár at biðja løgtingið samtykkja hana.

Sambært lógaruppskotinum kunnu sálarfrøðingar, sum hava føroyska útbúgving, eisini fáa løggilding eftir lógini.

Lagt er upp fyri í lógini, at ein føroysk útbúgving í sálarfrøði kemur einaferð.

Undir eftirliti

Sambært lógini koma sálarfrøðingar undir eftirlit hjá Psykolognævnet.

Men kærur um sálarfrøðingar í heilsuverkinum verða beindar til Sundhedsvæsenets disciplinærnævn.

Heilsumálaráðið hevur lagt lógaruppskotið um at seta donsku lógina í gildi í Føroyum á heimasíðuna. Hoyringarfreistin er til 3. februar.