SEV ger royndir við sjóvarfalsorku

Sjóvarfalsturbinur verða settar upp á havbotninum í streymasjógvi, har streymviðurskiftini eru hóskandi til at vinna orku burtur úr sjóvarfallinum

SEV sigur, at sjóvarfalsorka er mest støðuga orkukeldan á okkara leiðum, tá talan er um varandi orku

Mynd: sev.fo

Sigrún H. Brend

24.01.2014 - 13:28

SEV og stóra, týska fyritøkan, Voith, hava avtalað at gera royndir við sjóvarfalsorku. Tað skrivar sev.fo.

Samstarvið ber í fyrstu atløgu við sær, at Voith ætlandi setur eina sjóvarfalsturbinu upp á havbotninum á hóskandi stað í Føroyum.

Nevndarformaðurin í SEV, Jákup Suni Lauritsen, sigur við sev.fo, at SEV fegnast um møguleikan at fáa meiri vitan um hendan orkuformin í samstarvi við ein stóran, royndan leikara á økinum. Hetta er eisini í samsvari við grønu kósina hjá SEV at minka oljunýtsluna so nógv sum gjørligt.

Verkætlanin í Vestmannasundi heldur fram

Avtalan er eisini ein roynd at víðkað granskingarsamstarvið innan sjóvarfalsorku mótvegis útheiminum, eftir at SEV seinastu tíðina hevur samstarvað við Uffa Bærentsen, sum hevur roynt eina sjóvarfals-turbinu í Vestmannasundi.

Tað samstarvið heldur fram, hóast Voith nú eisini er inni í myndini. Voith er gomul týsk fyritøka, sum var stovnað í 1825.

SEV keypt meginpartin av sínum vatnturbinum frá Voith.