Rúsan flytur úr Skálavík til Sands

Í mai ella juni flytur sølustaðið hjá rúsdrekkasøluni í Mølhandlinum í Skálavík til Sands, har tey hava leigað bygningin, sum BankNordik helt til í.

Rógvi Fossádal, stjóri í Rúsdrekkasølu Landsins, sigur, at tey hava hugt at fleiri hølum í oynni, og nýggju hølini lúka treytirnar um, at tey skulu vera tíðarhóskandi og liggja høgligari fyri hjá viðskiftafólkunum. 

Nýggju hølini eru umleið líka stór sum tey í Skálavík, men leigumálið er betri, sigur Rógvi Fossádal, stjóri.