Oljulóggávan skal broytast

Knappliga 15 ár eru nú liðin, síðani fyrstu lógirnar at skatta og krevja framleiðslugjøld av kolvetnisvirksemi undir Føroyum vórðu samtyktar. Síðani hava verið trý útbjóðingarumfør.

Og oljuprísurin er ein heilt annar nú enn fyri 15 árum síðani.

Samanumtikið byggir galdandi lóggáva í Føroyum so at siga bara á inntøkur til landskassan fyri staðfest yvirskot av oljuframleiðslu. Framleiðslugjøldini eru viðfáningur. Tey eru læst føst í føstum krónuupphæddum og føstum prosenttali, sigur Tjóðveldi í uppskoti sínum til samtyktar.

Vinnumálaráðið vil eisini hava broytingar í oljulóggávuni fyri at kunna brúka góða hálva aðru millión krónur, sum vóru eftir í Føroyum, tá oljufelagið ENI gavst her í 2011. Pengarnir, sum ENI setti av til førleikamenning, skulu nú brúkast til at marknaðarføra leiting eftir olju við Føroyar.

Marknaðarføringin skal vara í trý ár, ætlar Vinnumálaráðið.