Thor kærir Heilsufrøðiligu

Reiðaríið Thor hevur kært ætlaðu avgerðina hjá Heilsufrøðiligu starvsstovuni um at vraka ein part av lastini, sum trolarin Ran kom heim við av Flemish Cap.

Thor heldur fast um, at frysti fiskurin er egnaður sum mannaføði.

Thor vil hava Heilsufrøðiligu starvsstovuna at kanna, hví fiskurin ikki er egnaður hjá fólki at eta. 

Thor vísir á, at grundgevingin hjá Heilsufrøðiligu starvsstovuni byggir ikki á kanningar av fiskinum, men bara á handfaringina av fiskinum, at hon ikki hevur verið eftir forskriftunum. 

Reiðaríið viðgongur tó í hoyringarskrivinum, at virkingin ikki var eftir forskriftunum í øllum førum.

Men tað var tí, at fiskurin var ov stórur, og tí ikki kundi frystast í frystarunum, sum vóru  til endamálið, og heldur ikki bleiv bleiv pakkaður, tí at útgerð ikki var til tess. 

Men Thor heldur ikki, at tað prógvar, at hann eisini er dálkaður.

Tí reiðaríið skrivar, at handfaringin dálkaði ikki fiskin.