- Tíðindi, mentan og ítróttur
Herurin tikið valdið í Egyptalandi
![](https://kvf.fo/sites/default/files/styles/grein-ovasta-mynd/public/a3b1a59a7d309492dae29ceab6bc03fa.png?itok=w4n34Mgh)
<p>Herurin hevur tikið valdið í Egyptalandi, og nýggi forsetin noyðist at akta boð frá hernaðarráðnum.</p>
<p>Tað er støðan eftir seinna umfar av forsetavalinum í Egyptalandi um vikuskiftið, skriva altjóða tíðindastovur.</p>
<p>Herurin kunngjørdi í nátt eina fyriskipan um, at hann hevur valdið á landsins fíggjarlóg, og nýggi forsetin fær ikki valdið á herinum. Hernaðarráðið hevur eisini gjørt av, at tjóðartingið skal ikki veljast av nýggjum, fyrr enn nýggj grundlóg er gjørd.</p>
<p>Í veruleikanum verður tað eisini herurin, sum einsamallur ger av, hvussu grundlógin fer at síggja út, skriva altjóða fjølmiðar.</p>
<p><strong>Muslimska brøðralagið vann</strong></p>
<p>Valevnið hjá muslimska brøðralagnum, Mohammed Mursi, hevur kunngjørt, at hann vann forsetavalið um vikuskiftið við 52,5 prosentum av atkvøðunum. Almenna valúrslitið verður ikki kunngjørt fyrr enn mikudagin ella hósdagin.</p>
<p>At forsetin ikki longur hevur valdið á herinum merkir, at tað er formaðurin í hernaðarráðnum, Hussein Tantawi, sum hevur veruliga valdið í landinum. Tantawi var verjumálaráðharri í stjórinini frákoyrda forsetanum, Hosni Mubarak, skriva tíðindastovurnar.</p>