Nýtt tunnilsfelag stovnast

<p>Løgtingið gav 10. apríl Jørgeni Niclasen, landsstýrismanni, loyvi til at stovna partafelagið, og fimm dagar seinni kom lógin í gildi. Og í gjárkvøldið boðaði Fíggjarmálaráðið til tíðindafundar í dag klokkan tvey um nýtt tunnilsfelag, sum skal stovnast.</p>

<p>Sambært lógini verður stovnað eitt alment partafelag, sum skal byggja og reka báðar tunlarnar. Landið setur tilsamans 400 milliónir kr. í felagið hetta til 2024. Tær fyrstu 15 milliónirnar setur landið í felagið longu í ár og tær seinastu hálvthundrað milliónirnar um tíggju ár.</p>

<p>Um neyðugt, kann landið hækka partapeningin, ella veita felagnum avmarkaða trygd fyri at fáa fígging til Sandoyartunnilin. Sambært lógini kann felagið eisini taka ábyrgdarlán, og landið skal veita felagnum 10 milliónir kr. í árligum rakstrarstuðli, tá Sandoyartunnilin er tikin í nýstlu.</p>

<p>Hetta er tað sama sum tað kostar landinum at hava Teistan í sigling um Skopunarfjørð. Eysturoyartunnilin verður mettur at kosta eina milliard og 50 milliónir kr., og Sandoyartunnilin verður mettur at kosta 860 milliónir kr.</p>

<p>Fyrst verður farið undir Eysturoyartunnilin, og tá hann er boraður, verður farið undir at bora Sandoyartunnilin, tó í seinasta lagi í 2018. Gongst sum ætlað verður koyrandi bæði í Eysturoyartunlinum og Sandoyartunlinum í 2021.</p>

<p>Lógin sigur eisini, hvar tunlarnir báðir vera. Eysturoyartunnilin hevur rundkoyring og kemur upp bæði á Strondum og í Runavík. Sandoyartunnilin verður millum Gomlurætt og Traðadal.</p>