Manningarlistin hjá Anitu er í fínasta lagi

Alt var í lagi, tá garnaskipið Anita mynstraði í Spania 15.august.

Tað sigur Elmar Højgaard, stjóri í Vørn, eftir at ein nevndarlimur í Fiskimannafelagnum, Axel Hansen, leggur Vørn undir ikki at røkja sína eftirlitsskyldu, tí sambært honum er manningarlistin hjá Anitu ikki í lagi.

Elmar Højgaard sigur, at manningarlistin, sum skiparin á Anitu sendi Fiskiveiðieftirlitinum 15.august vísir, at skipið er mynstrað í samsvari við krøvini í manningarskjalinum fyri Anitu. 

Øll krøv hildin

Fiskiveiðieftirlitið staðfestir, at skiparin á Anitu hevur fylgt galdandi reglum um mynstring til fulnar. 

Og Fiskiveiðieftirlitið hevur kannað Anitu, eftir at hon kom í føroyskan sjógv at royna.

Millum annað var manningarlistin kannaður, og alt var í lagi, eisini heilsuváttanir og trygdarskeið.   

550 listar kannaðar

Elmar Højgaard sigur, at Fiskiveiðieftirlitið kannar ikki upplýsingarnar í hvørjum einasta skipsmanningarlista, áðrenn skipini loysa.

Men síðani 2007 hevur Fiskiveiðieftirlitið kannað yvir 550 manningarlistar hjá føroyskum skipum.