Erik Ninn-Hansen er deyður, 92 ára gamal

Erik Ninn-Hansen var løgmálaráðharri í stjórnini hjá Poul Schluter, men hann og stjórnin løgdu frá sær í 1993, tá frágreiðingin um Tamilmálið avdúkaði, at tað var umsitið ólógliga.

Tamilar høvdu fingið noktað familju-samanføring, hóast lógin gav teimum rætt til tað, og tað var Erik Ninn Hansen, ið hevði ábyrgdina.

Hann legði frá sær sum løgmálaráðharri í 1989 og var formaður í Fólkatinginum eitt skifti, til tað var greitt, at Fólkatingið ikki longur hevði álit á honum.

Ríkisrættarsak móti Ninn-Hansen

Útlendingalógina við reglunum um familju-samanføring høvdu andstøðuflokkarnir fingið samtykt uttan um borgarligu stjórnina, og Erik Ninn-Hansen var harðliga ímóti henni.

Eftir Tamilfrágreiðingina varð ríkisrættarmál reist ímóti Erik Ninn Hasen, sum endaði við, at hann í 1995 fekk tríggjar mánaða treytað fongsul fyri at hava brotið lógina um ráðharraábyrgd.

Tað var fyrstu ferð í 80 ár, at dømt var í einum ríkisrættarmáli í Danmark.