Borgarstjórin velur Klaksvík fram um løgtingið

Jógvan Skorheim í Klaksvík stillar ikki upp til næsta løgtingsval.

Tí boðaði hann Sjálvstýrisflokkinum frá á landsfundi floksins í gjárkvøldið.

Jógvan Skorheim er borgarstjóri í Klaksvík, og hann fer næstu árini at brúka alla sína politisku orku til býráðsarbeiðið í Klaksvík.

- Vit eru mitt í eini spennandi tíð í Klaksvík við einum sera góðum meirilutasamstarvi í býráðnum. Hetta arbeiðið vil eg raðfesta fram um annað politiskt arbeiði komandi árini, sigur Jógvan Skorheim.

245 atkvøður

Jógvan Skorheim fekk næst flestar atkvøður á listanum hjá Sjálvstýrisflokkinum á løgtingsvalinum 29.oktober í 2011. Hann fekk 245 atkvøður. 

Í dag fer Kári P. Højgaard, løgtingsmaðurin hjá Sjálvstýrisflokkinum, til New York á aðalfundin hjá ST.

Tað verður kortini ikki Jógvan Skorheim, sum kemur í tingið fyri hann, men nummar trý á listanum, Kristianna Winther Poulsen.