Russland viðurkennir valið har eysturi í Ukraina

- Tey valdu hava fingið heimild at loysa mál og at fáa lívið í landspørtunum at ganga sína vanligu gongd, stendur í eini fráboðan frá uttanríkisráðnum í Moskva.

Sambært valnevndunum hevur loysingarleiðarin, Aleksander Sakhartjenko, vunnið stórsigur í Donetsk, og Igor Plotnitskij hevur vunnið valið í Lugansk. 

Sambært russisku tíðindastovini Itar-tass hevði uppreistrarleiðarin fingið 70 prosent, tá helvtin av atkvøðunum varð tald. 

Meðan Russland viðurkennir valúrslitið, sigur ES, at tað forðar fyri friði í Ukraina. 

Nýggi uttanríkispolitiski leiðarin í ES, Federica Mogherini, sigur, at valið er ólógligt, og at tað forðar fyri friði í landinum. ES fer ikki at viðurkenna valið, sigur Federica Mogherini.