Fíggjarmálaráðið heldur ikki játtanarkarmin

Heldur ikki Fíggjarmálaráðið, sum átti uppskotið um játtanarkarmar, heldur tað, sum løgtingið samtykti í vár.

Uppskotið hjá Fíggjarmálaráðnum um pengar til rakstur í fíggjarlógini fyri 2015 er 8,2 mió. kr. størri enn játtanarkarmurin sigur.

Millum annað standa fimm millónir krónur til P/f Skálafjarðar- og Sandoyartunnilin sum íløga í játtanarkarminum, men tær eru vorðnar rakstur í fíggjarlógaruppskotinum.

Sambært Fíggjarmálarðaðnum eru játtanarkarmarnir eitt langtíðarpolitiskt ætlanaramboð, har ætlaða gongdin í og stýringin av landshúsarhaldinum komandi fimm árini verður lýst. 

Neyðugar tillagingar

Landsstýrið hevur vegna broytingar í framskrivingum og raðfestingum gjørt neyðugar tillagingar í játtanarkørmunum fyri 2015. 

Samanumtikið ger hetta, at fíggjarlógaruppskotið ikki heilt er samsvarandi játtanarkørmunum, sum løgtingið samtykti í vár. 

Landsstýrið hevur tó lagt seg eftir at hava betri úrslit enn í játtanarkørmunum, sigur Fíggjarmálaráðið í svari til Fíggjarnevndina hjá løgtinginum.