Bjóða nólsoyarferjuna út í januar

Arbeiðið at byggja nýtt skip til Nólsoyarleiðina verður boðið út í januar, sigur Hilmar Eliasen, stjóri á Strandfaraskipum landsins.

Verkætlanin, sum Knud E. Hansen ger, verður liðug í desember, og síðani verður útbjóðingartilfarið gjørt.   

Løgtingið samtykti síðst í februar í fjør, at ferja skal byggjast til siglingina um Nólsoyarfjørð. 

Í mesta lagi 50 mió. kr.

Landsstýrismaðurin í vinnumálum fekk heimild frá løgtinginum at brúka í mesta lagi 50 milliónir krónur til ferjuna, sum tá, í februar í fjør, eftir ætlan skuldi setast í sigling í 2015. 

Tilfarið, sum skipasmiðjurnar kunnu bjóða eftir, skuldi vera liðugt í september í fjør.  

Nýggja nólsoyarferjan skal taka 170 ferðafólk um summarið og 90 um veturin. Pláss verður fyri 10-12 persónbilum og tveimum lastbilum.

Ternan røkir Nólsoyarleiðina, til nýggja skipið kemur.