Jagstra yvirgangsmenn í Norðurfraklandi

Í løtuni jagstra servandar herdeildir og løgregla yvirgangsmenninar, ið myrdu tólv fólk í París mikudagin, í Norðurfraklandi

Servandar herdeildir og løgregla jagstra í løtuni tveir menn, ið eru undir illgruna at hava myrt tólv fólk í yvirgangsatsóknini í París mikudagin, í Norðurfraklandi (á kortinum)

Mynd: Kort: Google Maps

Beinta Løwe

Bjarni Mohr

08.01.2015 - 16:03

Sambært tíðindastovuni, AFP, jagstra myndugleikarnir í Fraklandi í løtuni tveir brøður í Norðurfraklandi, ið eru undir illgruna fyri at hava staðið fyri álopunum í París í gjár.

Starvsfólk á eini bensinstøð í Norðurfraklandi siga seg vera vís í, at tey hava sæð teir báðar menninar, ið eru eftirlýstir fyri álopini á blaðið Charlie Hebdo mikudagin.

Eftirlýstu menninir hava, sambært BBC, rænt og stolið bensin á bensinstøðini. Harumframt loystu teir skot av, áðrenn teir flýggjaðu í einum bili.

Løgreglan í Villers-Cotterets, har menninir eru sæddir, hevur stongt allar vegir í royndini at handtaka teir báðar brøðurnar, ið eru undir illgruna.