Kristina Háfoss spyr um Keypsportalin

Er Keypsportalurin farin at grava undan lønarrættindum, sum fakfeløgini hava vunnið, og samráðingunum á arbeiðsmarknaðinum? Hendan spurning hevur Jørgen Niclasen, landsstýrismaður, fingið frá Kristinu Háfoss, løgtingskvinnu, nú fyri fyrstu ferð verður lýst eftir fólki á almenna Keypsportalinum.

Gjaldstovan hevur boðið út eitt verkætlanarstarv á Keypsportalinum. Kristina Háfoss spyr Jørgen Niclasen, um tað er samsvarandi almenna setanarpolitikkinum, tá Gjaldstovan bjóðar út eitt starv á keypsportalinum, har tímataksturin telur 50 prosent í vektingini, og førleikar, útbúgving og royndir telja hina helvtina.

Samanumtikið verður eitt alment starv boðið út, og tann, sum kann bjóða seg fram at gera arbeiðið fyri lægstu lønina, umframt at hava rættar førleikar, útbúgving og royndir, fær starvið, sigur Kristina Háfoss. Hon spyr eisini landsstýrismannin, um ætlanin nú er, at almennir stovnar í framtíðini skulu kunna nýta Keypsportalin at bjóða út almenn størv.

Gjaldstovan skal brúka fólk at gera eina strategi um, hvussu tænastur hjá tí almenna skulu talgildast. Arbeiðið skal, sambært útboðnum á Keypsportalinum, gerast í hesum árinum.