Eingin semja um samsýning til pedagogar

Tað eydnaðist ikki Semingsstovninum at fáa semju millum Pedagogfelagið og Lønardeildina i Fíggjarmálaráðnum um samsýningina, sum pedagogar skulu fáa, tá tey eru vegleiðarar hjá teimum, sum eru í starvsvenjing. 

Fundur var í nakrar tímar í gjár, men síðani boðaði Semingsstovnurin frá, at hann gavst við royndini at fáa partarnar at semjast. 

Avtalan um samsýningina varð gjørd fyri okkurt um 30 árum síðani. Pedagogfelagið segði avtaluna upp í heyst, tí tað vil hava hana dagførda. Avtalan fór úr gildi 1.mars.

Síðani hava samráðingar verið um nýggja avtalu millum Pedagogfelagið og Lønardeildina, men enn hava samráðingarnar ikki borið á mál.

Tí sendu partarnir boð eftir Semingsstovninum. Men heldur ikki tað gav úrslit.